جوّه المدرج حلمها
-ع البنش - وكتاب القانون
أول ما بتخش المحاضره
ويّا خطوتها البطيئه تترمي كل العيون
الخطوه موجه تتفرد فوق السلالم
سمّعت فـ وداني دقة كعبها
من دقه واحده شخبطت فوق الكلام
واتلخبط الحلم اللي واقف عـ الشجر
مسحت بأستيكه متاهات الغرام
بدأت حكاية قلب متربع على خد القمر
***
جوه المدرج رمشها
بيصحّي أحلام الحنينجوه البشر
ويصحي ألحان الهوى على خصرها
وانا إيه أنا
دا انا حلمي تايه وسط كل الموجودين
النظره منها تعطشك
فتقرب انت لشطها
فتغرقك
في حسنها
الضحكه فعلا مسكره
بتعلمك
درس فـ قصايد عنتره
***
جوه الكتاب فيه حلم مليان بالدفى
وسط الصفح
بتحب دايما تتنفى
وتروح قوام تكتب لها
أجمل قصيده فـ الحياه
وفـ لحظه تتسمر عيونك جوه نن عنيها فتلاقي الأمل
تتلخبط البنت اللي فارده حلمها فوق الخجل
يقع الكتاب من كفها
فتمد إيدك بالكتاب وتطلعه
فتلاقي نظره منها أطياف الكسوف متمكنه
مع كلمتين
- شكراً .. أنا متأسفه
يا ريت ماطلعت الكتاب
ولا شفتها
***
وف تاني بنش بتبتدي
تطلع فـ حلمك من جديد
فتحن للحن اللي معزوف عـ الوريد
مع إن حلمك عند آخر بنش
متلقح بعيد
والبنت قاعده في المحاضره
زي عصفوره بتعزف لحنها
مش واخده بالها مـ الحرايق جنبها
مش حاسّه بالعمر اللي واقف فوق ملامح ضحكها
والدنيا بتمطر أمل
***
وفـ لحظه يدّارى الأمل
تغرق سفينته ويتحرق حلم القُبل
ويضيع هوى من بين إيديه
لما المحاضر يلمحك
ويقوم فـ لحظه ويندهك
- سرحان فـ إيه
شعر
مصطفى حسان